Sa aking pagmumuni-muni sa loob ng banyo...

Kanina habang ako’y nakaupo sa toilet, napalingon ako sa paligid ng banyo. Malinis, maputi ang mga dingding. Sa tabi ng toilet bowl ang isang kulay dilaw na plastic pitcher, originally timplahan ng juice pero ngayo’y na-demote at ginagamit na lang na tabo. Napaisip ako, bakit nga ba dito sa NZ walang nabibiling plastic na tabo? Tayo lang bang mga Pinoy ang marunong maghugas ng wetpu? Lumingon-lingon pa ako sa aking paligid at nagisip kung ano-anong mga gamit na pangkaraniwang nakikita sa banyo natin sa Pinas ang hindi nakikita o nabibili dito sa NZ. Eto ang mga naisip ko. Lista ko, para kung pupunta kayo dito alam niyo ang dapat at di dapat dalhin.

1. Tabo – Naalala ko sa amin noon, lata ng pineapple juice ang ginagawang tabo o kaya yung plastic na lalagyan ng motor oil.
2. Batong panghilod – Huwag mo nang dalhin dito ang gamit mong batong panghilod at baka ipukpok pa sa ulo mo ng Customs Officer sa airport. Isa pa, problema mo pa kung ano isasagot mo kapag tinanong ka ng Customs Officer kung ano yon. Ano nga ba yon sa English?
   
3. Drum ng tubig – I suppose hindi na kailangan ito dito kasi di naman nauubusan ng tubig pampaligo. Although pwede itong gamitin na imbakan ng tubig-ulan para pandilig ng mga halaman.
   
4. Shampoo at conditioner na naka-sachet – Wala nito sa mga supermarket.
5. Baretang sabon na panlaba (katulad ng perla, ajax, mr clean) – Eto rin wala pa akong nakita dito nito.
6. Batya – Meron nito dito pero karamihan plastic nga lang, di tulad sa atin na aluminum. Natatandaan ko gamit namin noon korte pang higanteng tansan.
7. Arinola – Kung pala-ihi ka sa gabi at malayo room mo sa banyo magdala ka nito at wala nito dito. Diaper marami.
   
8. Palo-palo na gamit sa paglalaba – Huwag ka nang magdala nito, moderno na tayo dito, washing machine na gamit ng lahat. Pero kung mapilit ka, bumili ka na lang ng cricket bat, marami nun dito. Pwede na yon i-substitute.
   

Wala na yata akong maisip. Kayo, may maidadagdag pa ba kayo?