Anonymously yours, Randy

What would you do if the person you love is already married? This is the situation Randy (not his real name) found himself in. He sent me an email about his dilemma. I've changed some of the details so as to protect the true identity of the sender. I'll post my reply later. Meanwhile, readers out there, baka may maipapayo kayo kay Randy. Here's what he said:

Ka Uro, pagkabasa ko nung liham ni Linda at nung inyong sagot sa kanya, napagpasyahan kong ako naman ang mang-istorbo sa inyo. Pasensiya na po. Wala po kasi akong ibang mapagbalingan ng aking problema.

Beinte siete anyos at binata pa po ako, pero may GF sa Maynila. Plano na nga po namin magpakasal sa Disyembre. Engineer ako at madalas madestino sa iba-ibang bahagi ng Pilipinas.

Nagumpisa ang problema ko nang madestino ako sa Mindanao. Doon po may nakilala akong kapwa engineer na babae. Madalas po kaming nagkakasama sa mga site inspections at dahil dito nakagaanan ko siya ng loob. Mahal ko naman po ang aking GF, pero sa umpisa pa lang parang iba na ang naramdaman ko sa babaeng ito. Ang sarap niyang tumawa at napaka-malambing po kasi niya.

Minsan ginabi kami sa project at kami lang dalawa ang naiwan sa opisina. Habang kami’y nagkukwentuhan napasandal siya sa aking balikat. By instinct siguro bigla akong napa-akbay sa kanya. At nang masamyo ko ang kanyang perfume, hindi na ako nakapagpigil pa at naramdaman ko na lang na naglapat ang aming mga labi. Doon po nagsimula ang lahat. Magmula noon marami pang beses itong na-ulit. Subalit, hanggang kissing at petting lang po naman.

May dahilan po kung bakit nagpipigil kaming dalawa. Siya po’y meron nang asawa’t isang anak. Naging close pa nga po ako sa pamilya niya at ginawa pa nila akong ninong sa binyag ng kanilang anak. Yan po ang malaki kong problema. Hindi ko alam kung hanggang kailan kami makakapagtimpi at maitatago ang aming ugnayan. Katoliko po ako at alam kong mali ang aming ginagawa, pero tao lang po ako. Marupok.

Kung papayag siyang hiwalayan ang kanyang pamilya at sumama sa akin, nakahanda naman po ako. Pero pinag-iisipan ko pa kung tatanungin ko siya tungkol dito. Sabi niya mahal daw niya ang kanyang asawa at anak, kaya ayoko naman siyang i-pressure. Naguguluhan ako Ka Uro. Di ko alam ang dapat kong gawin. Napamahal na rin po kasi siya sa akin, bagamat mahal ko pa rin ang aking GF. Sana po, mapayuhan niyo ako sa aking suliranin.

Anonymously yours,

Randy